Pabor ang ilang Sangguniang Kabataan (SK) officials sa Romblon sa pagpapatuloy ng kanilang termino upang matiyak ang continuity ng mga programa at proyekto para sa kabataan kasunod ng pagpapaliban ng 2026 Barangay and Sangguniang Kabataan Elections (BSKE) hanggang 2028.
Ito ay matapos lagdaan ni Pangulong Ferdinand R. Marcos Jr. ang Republic Act No. 12326, na nagtakda sa limang taon ang termino ng mga halal na barangay at SK officials at itinakda ang susunod na regular na BSKE sa ikalawang Lunes ng November 2028.
Para kay SK Federation President Clark Alexis Mindo, mahalaga ang extension ng termino upang matiyak ang maayos na implementasyon at pagkumpleto ng mga programa at proyekto na naiplano na ng mga kasalukuyang opisyal.
“Personally, I’m in favor of continuity and extending the term of the barangay officials, especially if it will help ensure the proper implementation and completion of the programs and projects already planned,” ani Mindo.
Binigyang-diin niya na malaking bagay para sa mga SK officials ang extension dahil maipagpapatuloy nila ang mga nakapaloob sa kanilang three-year Comprehensive Barangay Youth Development Plan (CBYDP), na nagsisilbing gabay sa mga programa, proyekto at aktibidad para sa kabataan.
“Sayang naman po kung hindi maipagpapatuloy or matatapos nang maayos ang mga PPA's na nakaplano dahil lamang sa pagbabago ng administration,” dagdag niya.
Ayon kay Mindo, mas magiging epektibo ang pagpapatupad ng mga programa kung may continuity, maayos na monitoring at accountability sa mga kasalukuyang plano, habang nabibigyan din ng pagkakataon ang mga susunod na opisyal na magdagdag ng mga programa batay sa pangangailangan ng kabataan.
Samantala, kinilala rin ni SK Chairperson Hannah Manel Romano Clavel ng Barangay Taclobo ang batas na nagpapalawig sa termino ng mga kasalukuyang barangay at SK officials.
Sa kanyang pahayag, sinabi ni Clavel na bagama’t umaasa siyang matutuloy ngayong taon ang BSKE dahil nagbibigay ito ng pagkakataon sa mga bagong kabataang lider na makapaglahad ng kanilang mga ideya at makapaglingkod sa kanilang barangay, iginagalang niya ang batas at ang desisyong palawigin ang kasalukuyang termino.
Ayon kay Clavel, ang karagdagang panahon ay pagkakataon upang higit pang mapalakas ang mga kasalukuyang programa, mapanatili ang mga inisyatibang nakinabang ang kabataan at makapaglatag ng mga bagong aktibidad na tutugon sa kanilang pangangailangan, interes at mga mithiin.
Hinimok din niya ang mga kabataang nais magsilbi sa kanilang barangay na gamitin ang dagdag na panahon upang matuto, makilahok, magboluntaryo at maghanda para sa mga oportunidad na darating.
Binigyang-diin ni Clavel na ang pamumuno ay hindi lamang tungkol sa pagkakaroon ng posisyon kundi sa pagpiling maglingkod kahit walang nakakakita.
Sa ilalim ng RA No. 12326, itinakda sa limang taon ang termino ng lahat ng halal na barangay at SK officials. Nilimitahan naman sa dalawang magkasunod na termino sa parehong posisyon ang mga elective barangay officials, habang isang termino lamang sa parehong posisyon ang maaaring pagsilbihan ng elective SK officials.
Itinakda rin ng batas na ang susunod na regular na BSKE ay gaganapin sa ikalawang Lunes ng November 2028 at kada limang taon pagkatapos nito.
Para naman sa mga kasalukuyang barangay officials na nasa kanilang huling termino sa parehong posisyon, itinuturing silang nakumpleto na ang isang termino dahil sa dalawang taong extension at hindi na maaaring tumakbo sa parehong posisyon sa 2028 BSKE.
Inatasan din ng bagong batas ang pagpapatupad ng patuloy na training at capacity-building programs para sa barangay officials at SK members upang mapalakas ang kanilang kakayahan sa pagtupad ng mga tungkulin.
Discussion about this post