Hinikayat ni Liga ng mga Barangay (LNB) Provincial President Milo Q. Maulion ang mga Punong Barangay, kagawad, Sangguniang Kabataan (SK) officials at barangay workers sa Romblon na gamitin ang dagdag na panahon sa kanilang termino para higit pang mapahusay ang serbisyo sa mga komunidad.
Ang pahayag ni Maulion ay kasunod ng paglagda ni Pangulong Ferdinand R. Marcos Jr. sa Republic Act No. 12326, na nagtakda ng limang taong termino para sa mga halal na barangay at SK officials at naglipat sa susunod na Barangay at Sangguniang Kabataan Elections (BSKE) sa ikalawang Lunes ng November 2028.
Sa kanyang pahayag, sinabi ni Maulion na sinusuportahan niya ang bagong batas, ngunit binigyang-diin na ang karagdagang dalawang taon sa termino ay hindi dapat ituring na panahon ng pagpapahinga kundi dagdag na pagkakataon para sa paglilingkod.
Hinimok niya ang mga barangay officials na gamitin ang panahon upang tapusin at pagbutihin ang mga programa sa ilalim ng kanilang Barangay Development Plans, kabilang ang mga proyekto para sa kabuhayan, kalusugan at imprastraktura.
Nanawagan din siya ng mas tapat at transparent na pamamahala, partikular sa paggamit ng pondo ng barangay, at hinikayat ang mga opisyal na magkaisa at ituon ang kanilang mga gawain sa paghahatid ng serbisyo sa mga residente.
Ayon kay Maulion, mahalagang gamitin ng mga barangay sa Romblon ang dagdag na panahon upang makapag-iwan ng mga programang may pakinabang sa kanilang mga nasasakupan.
Sa ilalim ng RA 12326, ang susunod na regular BSKE ay gaganapin sa ikalawang Lunes ng November 2028 at susundan ng halalan kada limang taon. Nakatakda rin sa batas ang mga panuntunan sa term limits at iba pang transition provisions para sa kasalukuyang barangay at SK officials.
