Naitalaga na sa kani-kanilang mga paaralan at lugar ng assignment ang 26 School Counselor Associates (SCA) sa Schools Division of Romblon ngayong School Year 2026–2027.
Ayon kay Schools Division Superintendent Roger Capa, pirmado na ang appointments ng mga bagong personnel at karamihan sa mga ito ay nasa kani-kanilang assignment na.
“Bawat bagong personnel ay dagdag na kamay at dagdag na suporta sa ating mga paaralan upang mas maalagaan ang ating learners, mapagaan ang administrative workload, at mas mapalakas ang delivery ng ating mga programa at serbisyo,” ani Capa.
Ang 26 School Counselor Associates ay magsisilbing karagdagang suporta sa mga paaralan, partikular sa pagtugon sa mga pangangailangan ng mga mag-aaral at pagpapalakas ng guidance, mental health at psychosocial support.
First batch pa lamang umano ito ng mga school counselors at inaasahang madaragdagan pa sa susunod na taon.
Samantala, May 66 Administrative Officers at 33 Project Development Officers ring dagdag para sa Romblon na inaasahang tutulong sa mga gawaing administratibo at pagpapatupad ng mga programa at serbisyo ng Department of Education sa mga paaralan.
Ang pagtalaga ng mga SCA sa mga paaralan sa Romblon ay bahagi ng mas malawak na hakbang ng pamahalaan na palakasin ang school safety at kapakanan ng mga mag-aaral.
Sa isang pahayag, sinabi ni Pangulong Ferdinand R. Marcos Jr. na 10,000 School Counselor Associates ang kinuha ng pamahalaan para sa kasalukuyang school year upang makatulong sa pagsusulong ng ligtas at positibong learning environment para sa mga estudyante.
Ayon sa Pangulo, layunin ng programa na mabigyan ang mga kabataan ng mas malaking access sa support at guidance, kabilang ang mental health at psychosocial support, habang pinapalakas ang mga hakbang laban sa bullying, karahasan at iba pang hamon na kinakaharap ng mga mag-aaral.
Binigyang-diin din ni Marcos na dapat makapasok at makapag-aral ang mga estudyante nang walang pangamba at sa isang kapaligirang nangangalaga sa kanilang kaligtasan at kapakanan.
Kasabay nito, sinabi ng Pangulo na mahalaga ang pagtutulungan ng mga guro, magulang, barangay workers at iba pang stakeholders upang mapalakas ang seguridad sa mga paaralan at maiwasan ang mga insidente ng karahasan.
