Nanawagan si Romblon Governor Trina Alejandra Firmalo-Fabic ng mas matibay na pagtutulungan ng mga ahensya ng pamahalaan, lokal na pamahalaan, at mga komunidad upang matugunan ang malnutrisyon, kasabay ng pagbibigay-diin na hindi lamang tuwing Nutrition Month dapat isinusulong ang wastong nutrisyon.
Sa kanyang talumpati sa 52nd National Nutrition Month Regional Launching na ginanap sa Romblon State University noong July 7, sinabi ni Fabic na ang nutrisyon ay isang multisectoral na usapin na hindi kayang tugunan ng iisang ahensya lamang.
Aniya, bukod sa pagtatayo ng mga imprastraktura tulad ng mga kalsada, tulay, at gusali, mahalaga ring pagtuunan ng pansin ang “human infrastructure” sa pamamagitan ng pamumuhunan sa kalusugan at wastong nutrisyon ng mamamayan.
“Kung nagtatayo tayo ng physical infrastructure tulad ng mga kalsada, tulay, at gusali, mahalaga rin na pagtuunan natin ng pansin ang ating human infrastructure. Ang pag-unlad ng isang komunidad at lalawigan ay nakaatang sa kalusugan at pag-unlad ng ating mga mamamayan,” ani Fabic.
Ipinaliwanag ng gobernador na hindi lamang pagiging underweight ang suliranin sa nutrisyon kundi maging ang stunting at obesity, at binanggit na nananatiling isa sa pinakamalaking hamon sa Romblon ang stunting sa mga bata.
Ayon sa kanya, mas madaling dapuan ng sakit ang mga batang kulang sa nutrisyon, mas nahihirapang matuto sa paaralan, at mas mataas ang posibilidad na magkaroon ng chronic diseases pagdating ng panahon.
Hinamon din ni Fabic ang mga Barangay Nutrition Committees (BNCs) na masusing bantayan ang bawat batang natukoy na may malnutrisyon, stunting, o obesity at gumawa ng angkop na intervention para sa bawat kaso.
Aniya, maaaring makipag-ugnayan ang mga barangay sa mga Rural Health Unit para sa medical assessment, irekomenda ang mga indigent families sa mga programang pangkabuhayan at emergency employment tulad ng TUPAD, at humingi ng vegetable seeds mula sa Department of Agriculture upang mahikayat ang mga pamilya na magtanim ng sariling pagkain.
Bilang halimbawa, binanggit ni Fabic ang tagumpay ng Odiongan, kung saan bumaba ang malnutrition rate mula 7.5 porsyento tungo sa 2.5 porsyento dahil sa sama-samang pagkilos ng mga lokal na opisyal at health workers sa pagtukoy at pagtulong sa mga batang nangangailangan ng nutrisyon.
Binigyang-diin ng gobernador na ang tuloy-tuloy na pagtutulungan ng mga pambansang ahensya, lokal na pamahalaan, barangay, at mga pamilya ang susi sa pagbuo ng mas malusog at mas produktibong Romblon.
