Hinikayat ni Chief of Staff Denon Madrona, kinatawan ni Lone District Representative Eleandro Jesus “Budoy” Madrona, ang mga nagsipagtapos ng Romblon State University (RSU) na maging matatag, patuloy na matuto, at samantalahin ang mga oportunidad habang tinatahak nila ang kanilang mga napiling propesyon.
Inihatid ni Madrona ang mensahe ni Cong. Madrona sa graduation rites ng RSU Batch Tangluyan na ginanap noong Hunyo 5 sa Odiongan, Romblon.
Sa kanyang talumpati, binigyang-diin niya ang kahalagahan ng pagkakaroon ng maayos na ugnayan sa mga katrabaho at kapwa propesyonal kasabay ng pagpapakita ng husay sa trabaho.
Hinimok din niya ang mga nagtapos na maging handa sa mga hamon at pagbabago sa kanilang mga larangan at patuloy na paunlarin ang kanilang mga kaalaman at kakayahan.
Ayon kay Madrona, mahalagang magkaroon ng malinaw na layunin at huwag matakot sumubok ng mga bagong oportunidad upang matuklasan ang mga larangang naaayon sa kanilang kakayahan at interes.
Binigyang-diin din niya ang kahalagahan ng patuloy na pag-aaral at pagiging bukas sa mga bagong ideya, lalo na sa panahon ng mabilis na pagbabago sa teknolohiya at mundo ng trabaho.
Hinikayat din niya ang mga bagong graduates na maging determinado sa pag-abot ng kanilang mga pangarap at manatiling nakatuon sa kanilang mga layunin sa kabila ng mga pagsubok.
Kasabay nito, nagpaabot siya ng pagbati sa mga magulang, guardian, faculty members, at administrators ng unibersidad para sa kanilang naging bahagi sa pagtatagumpay ng mga nagsipagtapos.
Ayon sa tanggapan ni Cong. Madrona, nananatiling bahagi ng kanilang mga prayoridad ang pagsusulong ng kalidad na edukasyon para sa mga kabataang Romblomanon.
