Inaprubahan ng Provincial Peace and Order Council (PPOC) ng Romblon ang isang resolusyon na bubuo sa isang Provincial Multi-Agency Partnership at Technical Working Group (TWG) upang palakasin ang mga hakbang laban sa rape at iba pang anyo ng sexual violence sa lalawigan.
Pinagtibay ang resolusyon sa ginanap na ikalawang quarter meeting ng PPOC kung saan magsasama-sama ang iba't ibang ahensya ng pamahalaan kabilang ang Department of Health (DOH), Department of Social Welfare and Development (DSWD), Philippine National Police (PNP), Department of Education (DepEd), at Pamahalaang Panlalawigan ng Romblon.
Layunin ng technical working group na palakasin ang koordinasyon ng mga ahensya, paigtingin ang mga hakbang sa pag-iwas sa sexual violence, at magpatupad ng mga intervention program sa mga komunidad.
Batay sa datos na inilahad ng Romblon Police Provincial Office, nakapagtala ang lalawigan ng 30 kaso ng rape mula Enero 1 hanggang Hunyo 15, 2026, mas mababa kumpara sa 32 kaso sa kaparehong panahon noong 2025.
Katumbas ito ng 6.25 porsiyentong pagbaba sa bilang ng mga naitalang kaso ng rape sa lalawigan.
Iniulat din ng Romblon Police Provincial Office na bumaba sa 46 kaso ang kabuuang focus crimes sa Romblon mula sa 67 kaso noong 2025, o katumbas ng 31.34 porsiyentong pagbaba.
Sa ilalim ng resolusyon, inaasahang magsasagawa ang mga kalahok na ahensya ng mga information campaign, pagpapalakas ng reporting mechanisms, pagbibigay ng psychosocial at health services sa mga biktima, pagpapaigting ng law enforcement efforts, at mga programang pang-edukasyon sa mga paaralan at komunidad.
Inaayon din ng hakbang ang mga probisyon ng Regional Peace and Order Council (RPOC) MIMAROPA Resolution No. 07, Series of 2025 na nagtataguyod ng multi-sectoral approach sa pagtugon sa mga kaso ng sexual violence.
Ayon kay PPOC Chairperson at Romblon Governor Trina Alejandra Firmalo-Fabic, layunin ng inisyatiba na mapalakas ang koordinasyon ng mga ahensya ng pamahalaan sa pagtugon sa mga kaso ng sexual violence at mapahusay ang proteksyon para sa mga kababaihan, bata, at iba pang vulnerable sectors sa lalawigan.
