Nagsagawa ang Philippine Information Agency (PIA) MIMAROPA ng capacity-building training para sa mga information officer mula sa iba't ibang pambansang ahensya ng pamahalaan at lokal na pamahalaan sa Romblon noong Hunyo 4 upang palakasin ang komunikasyon ng pamahalaan at paghahatid ng impormasyon sa publiko.
Isinagawa ang pagsasanay sa Provincial Government Building sa Odiongan kung saan nagtipon ang mga public information officer at government communicator mula sa iba't ibang tanggapan sa lalawigan.
Tinalakay sa pagsasanay ang mga paksa tungkol sa radio broadcasting, crisis communication, at mobile journalism upang mapalawak ang kakayahan ng mga kalahok sa paggamit ng iba't ibang plataporma sa pagpapalaganap ng impormasyon.
Pinangunahan ni PIA Occidental Mindoro Information Center Manager Voltaire Dequina ang sesyon sa radio broadcasting kung saan ibinahagi niya ang mga kaalaman sa epektibong paghahatid ng impormasyon sa pamamagitan ng radyo at pagbuo ng nilalaman para sa mga information campaign ng pamahalaan.
Samantala, tinalakay ni Information Officer III Juanito Joshua Sugay ang mga estratehiya sa crisis communication at ang kahalagahan ng maagap, tama, at responsableng pagpapalabas ng impormasyon sa panahon ng mga emerhensiya at iba pang kritikal na sitwasyon.
Nagbigay naman ng pagsasanay sa mobile journalism si PIA Oriental Mindoro Information Center Manager Ace Sapit, kung saan ipinakita niya ang paggamit ng smartphones at iba pang digital tools sa paglikha ng balita at impormasyon para sa mga online platform.
Ayon kay PIA MIMAROPA Regional Head Jemin Bonafe-Guillermo, mahalagang papel ang ginagampanan ng mga government communicator sa pagsusulong ng transparency at pagtiyak na nakararating sa mga komunidad ang tama at napapanahong impormasyon.
Aniya, nagsisilbing tulay ang mga information officer sa pagitan ng pamahalaan at mamamayan, lalo na sa pagtugon sa maling impormasyon at pagpapalawak ng kaalaman ng publiko hinggil sa mga programa at serbisyo ng gobyerno.
Dagdag pa ni Guillermo, mahalaga ang gawain ng mga government communicator sa paglapit ng mga serbisyo at impormasyon ng pamahalaan sa mamamayan.
Naging bahagi rin ng aktibidad ang pagpapalakas ng ugnayan at koordinasyon ng mga information officer sa lalawigan upang magkaroon ng mas organisado at magkakatuwang na pamamaraan sa paghahatid ng impormasyon sa publiko.
Ang pagsasanay ay bahagi ng Romblon Communicators Network Conference and Training na inorganisa ng PIA MIMAROPA para sa mga information officer at communication practitioner sa lalawigan.
