Maaari nang gamitin ng mga benepisyaryo ng Department of Social Welfare and Development (DSWD) ang kanilang guarantee letters (GLs) sa Mercury Drug branch sa Odiongan, Romblon para sa pagbili ng mga gamot at iba pang medical supplies simula June 22.
Ito ay matapos palawakin ng DSWD ang kasunduan nito sa Mercury Drug Corporation kung saan 262 sangay ng botika sa buong bansa ang muling tumatanggap ng mga guarantee letter na inisyu sa ilalim ng Assistance to Individuals in Crisis Situations (AICS) at iba pang programa ng ahensya.
Ayon sa DSWD, layunin ng programa na gawing mas madali para sa mga benepisyaryo ang pagkuha ng kinakailangang gamot nang hindi na kailangang maglabas agad ng pera habang pinoproseso ang kanilang tulong medikal. Ang guarantee letter ay dokumentong inisyu ng ahensya na nagsisilbing garantiya ng bayad sa mga accredited service provider, kabilang ang mga botika.
Sa Romblon, inaasahang makatutulong ang hakbang sa mga residente na nangangailangan ng agarang tulong medikal, lalo na sa mga pasyenteng may maintenance medicines at iba pang reseta mula sa kanilang mga doktor.
Ayon pa sa DSWD, bahagi ito ng patuloy na pagpapalawak ng access ng mga benepisyaryo sa mga serbisyong pangkalusugan sa pamamagitan ng pakikipagtulungan sa mga pribadong establisimyento.
Pinapayuhan naman ang mga kliyente ng DSWD na makipag-ugnayan sa pinakamalapit na tanggapan ng ahensya para sa mga detalye tungkol sa paggamit ng guarantee letters at iba pang kinakailangang dokumento bago bumili ng gamot sa mga kalahok na sangay ng Mercury Drug.
Discussion about this post