Nagdeploy ang Romblon Police Provincial Office (PPO) ng mga pulis, force multipliers, at katuwang na ahensya bilang bahagi ng pagpapatupad ng Ligtas Balik-Eskwela ngayong taon kaugnay ng pagbubukas ng klase para sa School Year 2026–2027 ngayong June 8.
Ayon sa Romblon PPO, binabantayan at sinisiguro ng mga awtoridad ang 252 pampublikong paaralan at 17 pribadong paaralan sa buong lalawigan upang matiyak ang ligtas at maayos na pagbabalik-eskwela ng mga mag-aaral, guro, at iba pang school personnel.
Bilang bahagi ng security measures, nagtayo ang pulisya ng 36 Police Assistance Desks (PADs) sa mga paaralan at pangunahing transport hubs sa lalawigan. Pinangangasiwaan ang mga ito ng 92 pulis na nakahandang magbigay ng agarang tulong at tumugon sa mga isyung may kaugnayan sa seguridad at kaayusan.
Nagdeploy din ang Romblon PPO ng 62 mobile patrollers at 81 beat patrollers sa iba't ibang lugar, partikular sa mga lugar na may mataas na bilang ng mga estudyante at iba pang convergence areas.
Nakibahagi rin sa operasyon ang Bureau of Fire Protection (BFP) at Philippine Coast Guard (PCG) na nagtalaga ng kabuuang 54 personnel para tumulong sa traffic management, emergency response, disaster preparedness, at iba pang public safety measures.
Samantala, 105 force multipliers na binubuo ng mga community volunteer at iba pang stakeholder ang naitalaga upang makatulong sa pagpapanatili ng kapayapaan at kaayusan sa panahon ng pagbubukas ng klase.
Ayon kay Romblon PPO Provincial Director PCOL Rexton Sawi, mahalaga ang pagtutulungan ng iba't ibang sektor upang matiyak ang kaligtasan ng mga mag-aaral, guro, at magulang sa pagsisimula ng panibagong taon ng pag-aaral.
Sinabi niya na nakahanda ang Romblon PPO na tumugon sa anumang concern at magpatupad ng mga hakbang upang mapanatili ang kapayapaan at kaayusan sa buong lalawigan.
Ang Ligtas Balik-Eskwela ay taunang programa ng Philippine National Police na naglalayong tiyakin ang seguridad, kaayusan, at kaligtasan ng mga mag-aaral at iba pang stakeholders sa panahon ng pagbubukas ng klase.
