Naghanda ang Department of Social Welfare and Development (DSWD) MIMAROPA ng mahigit ₱158.35 milyong halaga ng standby funds at relief resources bilang paghahanda sa posibleng epekto ng tag-ulan at iba pang kalamidad sa rehiyon.
Batay sa ulat ni DSWD MIMAROPA Regional Director Benchie B. Gonzales sa 2026 Regional Disaster Risk Reduction and Management Council (RDRRMC) MIMAROPA Second Quarter Full Council Meeting, umabot sa ₱158,351,399.39 ang kabuuang halaga ng available standby funds, stockpiled, at prepositioned relief goods ng ahensya hanggang Hunyo 16, 2026.
Ayon sa DSWD, nakaposisyon na ang mga relief resources sa iba't ibang bahagi ng rehiyon upang matiyak ang agarang paghahatid ng ayuda sa mga residenteng maaapektuhan ng mga sakuna.
Layunin ng prepositioning ng mga relief goods na mapabilis ang disaster response ng ahensya at matiyak na may sapat na suplay ng tulong para sa mga komunidad na maaaring maapektuhan ng masamang panahon.
Patuloy namang nakikipag-ugnayan ang DSWD sa mga lokal na pamahalaan at iba pang miyembro ng RDRRMC upang matiyak ang kahandaan sa mabilis na pagtugon sa anumang emergency o sakuna sa MIMAROPA.
