Iginiit ni Romblon Governor Trina Firmalo-Fabic na kailangang mahigpit na sundin ng mga barangay ang mga alituntunin ng Socio-Civic Projects Fund (SCPF), partikular sa pagpapatupad ng scholarship program.
Sa kanyang mensahe sa Strategic Barangay Development Planning na ginanap sa Odiongan, binigyang-diin ni Fabic na malinaw ang guidelines ng programa, kabilang ang limitasyon na limang estudyante lamang ang maaaring maging benepisyaryo, na bawat isa ay dapat tumanggap ng buong ₱20,000 educational assistance.
“Malinaw po, lima lang. Kasi narinig ko sa ibang barangay na ang plano ay lima ang nakapangalan, pero ang ₱20,000 bawat scholar ay hahati-hatiin. Huwag na huwag ninyong gagawin iyon,” ani Fabic.
Ayon sa gobernador, ang hindi pagsunod sa itinakdang alituntunin ay maaaring magdulot ng pananagutan sa mga opisyal ng barangay, lalo na’t ang pondo ay nakapangalan sa mga partikular na benepisyaryo.
Ipinaliwanag din niya na ang scholarship program ay mula sa Office of the President at kinakailangang sundin ang malinaw na patakaran nito upang maiwasan ang anumang problema sa implementasyon.
Pinayuhan din ni Fabic ang mga barangay na tiyaking ang mga napiling benepisyaryo ay hindi tumatanggap ng ibang scholarship o educational subsidy mula sa pamahalaan, tulad ng TES, UniFAST, o CHED, upang mabigyan ng pagkakataon ang iba pang kwalipikadong estudyante.
Dagdag pa niya, kung walang kwalipikadong fourth-year college student sa barangay, maaaring pumili mula sa third-year, second-year, o first-year students, alinsunod sa guidelines ng programa.
Hinikayat din ng gobernador ang mga opisyal ng barangay na kumonsulta sa mga itinalagang focal persons kung may mga katanungan upang matiyak ang maayos at tamang pagpapatupad ng programa.
Ang scholarship assistance ay bahagi ng ₱200,000 Socio-Civic Projects Fund na ipinagkaloob sa bawat barangay, kung saan ₱100,000 ang inilaan para sa limang iskolar at ang natitirang ₱100,000 ay para sa mga proyektong pangkaunlaran ng barangay.
