Sinabi ni Commission on Higher Education (CHED) Commissioner Michelle Aguilar Ong na ang pagkakasama ng Romblon State University (RSU) sa mga nangungunang unibersidad sa World University Rankings for Innovation (WURI) 2026 ay nagpapakita ng pagkilala ng ibang mga institusyon sa kakayahan nitong makalikha ng mga makabagong programang may epekto sa komunidad.
Sa panayam ng Philippine Information Agency (PIA) Romblon, ipinaliwanag ni Ong na ang WURI ay isang peer ranking system kung saan sinusuri at niraranggo ng mga unibersidad ang mga programang isinusumite ng kapwa institusyon batay sa antas ng inobasyon at epekto ng mga ito.
Ayon sa opisyal, mahalaga ang pagkilala dahil ang pagraranggo ay nagmumula mismo sa mga kasamang unibersidad at eksperto sa sektor ng mataas na edukasyon.
Nakuha ng RSU ang ika-37 puwesto sa WURI 2026, dahilan upang mapasama ito sa Top 500 Most Innovative Universities in the World.
Nakapagtala rin ang unibersidad ng 19 entries sa Global Top 100 categories, kabilang ang Crisis Management, Ethics and Integrity, Digital and AI Transformation, Infrastructure and Technology, at Inclusive Social Innovation.
Ayon naman kay RSU President Merian P. Catajay-Mani, nakatuon ang WURI sa pagsusuri ng mga inobasyong may direktang pakinabang sa mga paaralan at komunidad.
Ipinaliwanag niya na ang mga programang kinikilala sa naturang ranking ay yaong nakatutulong sa pagtugon sa mga pangangailangan ng mga mamamayan at nakapagbibigay ng positibong epekto sa lipunan.
Sinabi rin ni Mani na mas pinili ng unibersidad na ilaan ang pondo nito sa pagpapaunlad ng mga pasilidad at serbisyo para sa mga estudyante kaysa sa pagsali sa ilang international ranking systems na nangangailangan ng malaking bayarin.
Mula sa ika-261 puwesto noong 2024 at ika-56 puwesto noong 2025, patuloy na umangat ang ranggo ng RSU hanggang sa maabot nito ang ika-37 puwesto ngayong 2026.
Ang WURI ay isang pandaigdigang ranking system na sumusukat sa kakayahan ng mga unibersidad na makapagpatupad ng mga programang makabago at may epekto sa komunidad, industriya, at lipunan.
Discussion about this post