Pinuri ng Philippine National Police (PNP) ang mga residente at iba’t ibang sektor sa Romblon dahil sa pagtutulungan upang mapanatili ang kapayapaan at pagiging insurgency-free ng lalawigan.
Sa isinagawang reaffirmation ceremony ng pagiging Stable Internal Peace and Security (SIPS) area ng Romblon, sinabi ni Col. Rexton Sawi, Provincial Director ng Romblon Police Provincial Office, na hindi lamang kawalan ng insurgency-related threats ang ipinapakita ng deklarasyon kundi pati ang matatag na pamamahala, aktibong partisipasyon ng komunidad, at sama-samang pagsusulong ng kapayapaan at kaunlaran.
Ayon kay Sawi, naging posible ang naturang milestone dahil sa dedikasyon ng mga miyembro ng PNP, Armed Forces of the Philippines, mga lokal na pamahalaan, partner agencies, peace advocates, at mismong mga mamamayan ng Romblon.
“This declaration is a testament to the unwavering dedication and sacrifices of our security forces, particularly the men and women of the Philippine National Police and the Armed Forces of the Philippines, whose vigilance and professionalism have ensured the safety and security of our communities,” ayon kay Sawi.
Binigyang-diin din niya na hindi lamang responsibilidad ng mga uniformed personnel ang pagpapanatili ng kapayapaan kundi tungkulin din umano ito ng bawat mamamayan.
“Peace and security are not the sole responsibility of uniformed personnel. They are the shared responsibility of every citizen,” dagdag niya.
Sinabi rin ni Sawi na mahalagang ipagpatuloy ang pagbabantay at koordinasyon upang hindi na muling magkaroon ng banta ng insurgency sa lalawigan.
Habang ipinagdiriwang umano ang naturang tagumpay, nanawagan siya sa lahat ng sektor na manatiling committed sa pagpapanatili ng kapayapaan at pagpigil sa muling pag-usbong ng mga banta sa seguridad.
Matatandaang unang idineklara ang Romblon bilang insurgency-free province noong 2019, kabilang ang lahat ng mga munisipyo nito. Sa ilalim ng SIPS declaration, kinikilala ang mga lugar na walang aktibong armadong banta at may matatag na peace and order situation sa tulong ng koordinasyon ng pamahalaan, security sector, at komunidad.
