Target ng Provincial Health Office (PHO) ng Romblon na mabakunahan ang halos 26,000 bata sa lalawigan sa ilalim ng Measles-Rubella Supplementary Immunization Activity na nakatakdang ilunsad sa darating na Agosto.
Ayon kay Ma. Crisel Ann Fallaria, Health Education and Promotion Officer ng Provincial Health Office, bahagi ito ng nationwide immunization program ng Department of Health (DOH) katuwang ang mga Provincial Health Offices at Rural Health Units sa buong bansa.
Layunin ng programa na maprotektahan ang mga bata laban sa mga vaccine-preventable diseases tulad ng tigdas, tigdas-hangin, at iba pang sakit na maaaring maiwasan sa pamamagitan ng bakuna.
Ayon kay Fallaria, target ng kampanya na mabakunahan ang 95 porsyento ng populasyon ng mga batang may edad anim na buwan hanggang 59 buwan sa lalawigan.
“Importante pong mabakunahan ang mga bata para makaiwas sila sa mga sakit gaya ng tigdas at tigdas-hangin. Libre po itong ibibigay sa komunidad,” ani Fallaria.
Dagdag pa niya, mahalagang maunawaan ng mga magulang ang benepisyo ng pagpapabakuna upang maprotektahan ang kalusugan ng kanilang mga anak.
“Sa mga magulang po na natatakot, pinapayuhan namin sila na mahalagang mabakunahan ang kanilang mga anak dahil sa pagbabakuna ay puwedeng mailigtas ang mga bata sa mga sakit na maaari namang maiwasan,” dagdag niya.
Ipinaliwanag din ng PHO na ang tigdas ay isang nakahahawang sakit na maaaring magdulot ng seryosong komplikasyon lalo na sa mga batang mababa ang resistensya. Maaari itong magresulta sa pulmonya, impeksyon sa utak, matinding dehydration, at iba pang komplikasyon kapag hindi naagapan.
Isasagawa ang pagbabakuna sa mga Rural Health Units (RHU), barangay health stations, at sa pamamagitan ng house-to-house at community-based immunization activities upang mas maraming bata ang maabot ng programa.
Ayon sa PHO, katuwang din nila sa kampanya ang mga barangay officials, health workers, at mga lokal na pamahalaan upang mas mapalawak ang information drive hinggil sa kahalagahan ng pagbabakuna.
Hinikayat naman ng mga health officials ang mga magulang na dalhin ang kanilang mga anak sa pinakamalapit na vaccination site sa oras na magsimula ang immunization campaign sa Agosto.
