Makakatulong umano ang patuloy na pagiging insurgency-free at pagkakaroon ng Stable Internal Peace and Security (SIPS) status ng Romblon upang makahikayat ng mas maraming investors at negosyo sa lalawigan.
Ito ang binigyang-diin ni Governor Trina Alejandra Q. Firmalo-Fabic sa isinagawang reaffirmation ceremony ng SIPS status ng lalawigan.
Ayon sa gobernador, isa sa mga pangunahing tinitingnan ng mga investors at negosyo ay ang peace and order situation ng isang lugar bago sila magpasya na mamuhunan.
“Kapag may mga investors at mga bisita, isa po iyan sa tinitingnan nila kung ang isang lugar ay stable ang internal public safety, peace and order,” ayon kay Firmalo-Fabic.
Dagdag pa niya, maaaring gamitin ng mga lokal na pamahalaan ang SIPS status bilang bahagi ng kanilang investment promotion upang makahikayat ng mas maraming negosyo at oportunidad sa Romblon.
Ipinaliwanag din ng gobernador na malaking tulong ang mapayapang sitwasyon sa lalawigan dahil naiiwasan ang pagkawala ng buhay at paggamit ng malaking resources para sa armadong tunggalian at sa halip ay nailalaan ang mga ito sa development programs at serbisyo publiko.
Samantala, sinabi naman ni Brigadier General Melencio W. Ragudo na mahalaga ang tuloy-tuloy na koordinasyon ng mga lokal na pamahalaan, security sector, at komunidad upang mapanatili ang kapayapaan at kaayusan sa lalawigan.
Matatandaang unang idineklara ang Romblon bilang insurgency-free province noong 2019. Bukod sa buong lalawigan, idineklara ring insurgency-free ang lahat ng mga munisipyo sa Romblon matapos makamit ang mga pamantayan ng pamahalaan hinggil sa internal security at peace and order.
Batay sa guidelines ng pamahalaan, naidedeklara ang isang lugar bilang Stable Internal Peace and Security area kapag wala nang aktibong armadong banta mula sa insurgent groups at kapag nananatiling maayos ang peace and order situation sa lugar sa tulong ng koordinasyon ng lokal na pamahalaan, law enforcement agencies, military, at komunidad.
Dinaluhan ang programa ng mga kinatawan mula sa Armed Forces of the Philippines, Philippine National Police, Department of the Interior and Local Government, mga alkalde, miyembro ng Sangguniang Panlalawigan, at iba pang partner agencies sa Romblon.
Discussion about this post