Nanawagan ang Pamahalaang Panlalawigan ng Romblon sa mga shipping companies na nag-ooperate sa lalawigan na agad na irepaso at ibaba ang kanilang pasahe kasunod ng pagbaba ng presyo ng langis at bagong direktiba ng Maritime Industry Authority (MARINA).
Sa isang liham na nilagdaan ni Trina Alejandra Q. Firmalo-Fabic, hinimok ng pamahalaang panlalawigan ang mga shipping lines na sumunod sa MARINA Advisory No. 2026-23, Series of 2026.
Ayon sa gobernador, bagamat pinayagan noon ang taas-pasahe bilang pansamantalang remedyo sa pagtaas ng presyo ng produktong petrolyo, hindi ito dapat manatiling permanente lalo na ngayong bumababa na ang presyo ng langis sa merkado.
Binigyang-diin din ni Firmalo-Fabic na mahalaga ang abot-kayang pamasahe sa isang arkipelagong lalawigan tulad ng Romblon na umaasa sa transportasyong pandagat para sa pagbiyahe ng mga residente, produkto, at pangunahing serbisyo.
Sinabi ng gobernador na direktang naaapektuhan ng dagdag-pasahe ang kabuhayan ng mga Romblomanon kaya mahalagang maging sensitibo ang mga shipping companies sa kalagayan ng publiko.
Dahil dito, hiniling ng pamahalaang panlalawigan ang agarang pagkalkula at pagpapatupad ng mas mababang pamasahe nang walang pagkaantala.
Hinimok din ang mga shipping companies na ilathala at ipaskil ang updated fare matrix sa mga pantalan, barko, terminals, ticketing offices, at maging sa kanilang official online platforms upang malinaw na makita ng mga pasahero ang bagong singil.
Inatasan din ang mga kumpanya na magsumite ng opisyal na kopya ng kanilang fare matrix sa MARINA at sa pamahalaang panlalawigan para sa monitoring at gabay sa publiko.
Kasabay nito, nanawagan din ang pamahalaang panlalawigan sa MARINA na higpitan ang pagbabantay at inspeksyon sa mga ipinapatupad na pasahe sa mga pantalan upang matiyak na nararamdaman ng mga commuter ang rollback sa pamasahe.
Bagamat kinikilala umano ng lokal na pamahalaan ang mga gastusin at hamon sa operasyon ng mga shipping companies, iginiit nito na may kaakibat na pananagutan sa publiko ang mga ito upang matiyak na nananatiling patas, makatwiran, at naaayon sa batas ang singil sa pamasahe sa lalawigan.
Discussion about this post