Tinalakay ng mga opisyal ng kalusugan at lokal na pamahalaan sa Romblon ang mga hakbang upang mapalakas ang integration ng province-wide health system bilang bahagi ng pagpapatupad ng Universal Health Care (UHC) Law sa isinagawang Integrated Health System Strengthening meeting noong Mayo 18 hanggang 20 sa Prince Aly Hotel sa Odiongan.
Dinaluhan ang aktibidad ng mga chief of hospitals, municipal mayors, municipal health officers, kinatawan ng Department of Health MIMAROPA Center for Health Development, Provincial Health Office staff, at iba pang opisyal ng pamahalaan.
Ayon sa mga organizer, layunin ng pagpupulong na palakasin ang koordinasyon at integrasyon ng health system sa buong lalawigan upang matiyak ang continuity of care at mabawasan ang out-of-pocket expenses ng mga pasyente alinsunod sa mandato ng UHC Law.
Sa ilalim ng integrated health system, mas pinagtitibay ang ugnayan ng mga ospital, Rural Health Units, at iba pang healthcare facilities upang maging mas maayos at tuloy-tuloy ang pagkuha ng serbisyong pangkalusugan ng mga residente.
Tinalakay rin sa pagpupulong ang mga hamon at posibleng hakbang upang mapabuti pa ang health governance, access sa health services, human resources for health, health financing, at community participation lalo na sa mga lugar sa lalawigan na kabilang sa Unserved and Underserved Areas (UUA).
Naging pangunahing tagapagsalita sa aktibidad si Dr. Aryameir Ismael, isang individual consultant ng DOH MIMAROPA CHD at dating propesor ng Ateneo de Manila University.
Nagbahagi siya ng mga gabay at pananaw hinggil sa community assessment, situational analysis, at pagtukoy sa mga pangunahing salik na nakaaapekto sa kalagayan ng kalusugan sa iba’t ibang komunidad.
Dumalo rin sa aktibidad si Governor Trina Alejandra Firmalo-Fabic kasama ang mga municipal mayors na nagpahayag ng suporta sa pagpapalakas ng sektor ng kalusugan sa lalawigan.
Ayon sa DOH MIMAROPA, mahalaga ang pagtutulungan ng mga lokal na pamahalaan at healthcare institutions upang mas mapalawak ang access sa dekalidad at tuloy-tuloy na serbisyong pangkalusugan para sa mga Romblomanon.
Discussion about this post