Siniguro ng Tablas Island Electric Cooperative (TIELCO) na may sapat na suplay ng krudo ang SUWECO Tablas Energy Corporation (STEC) para mapanatili ang operasyon ng kanilang powerplant sa Tablas Island sa susunod na dalawang linggo.
Sa ginanap na 40th Annual General Membership Assembly ng TIELCO, iniulat ni TIELCO General Manager Dennis Alag na may paparating na krudo ang STEC na sapat para sa operasyon sa loob ng dalawang linggo.
Aniya, inaasahang darating ang panibagong supply ng krudo sa Tablas Island ngayong Abril 26.
Dahil dito, sinabi ni Alag na walang inaasahang kakulangan sa suplay ng kuryente sa Tablas Island at sa bayan ng San Jose, Romblon, sa kabila ng mga pangamba sa suplay ng krudo sa bansa kaugnay ng patuloy na pagtaas ng presyo ng langis bunsod ng gyera sa Iran.
Dagdag pa ni Alag, nakikipagpulong din siya sa mga opisyal ng Department of Energy at mga attach agencies nito upang masiguro na hindi makararanas ng shortage ng kuryente ang Tablas Island sa gitna ng krisis sa langis.
Bagama’t may mga ulat na nagkakaroon ng problema sa suplay ng kuryente sa Catanduanes na isa rin sa mga lugar na sineserbisyuhan ng SUWECO, nilinaw ni Alag na hindi umano ito mangyayari sa Romblon dahil sa koordinasyon ng pamahalaan, electric cooperative at ng power supplier.
Kinumpirma rin ni Engr. Rey Pole, Assistant Vice President of Operations ng STEC, na paparating ang supply ng krudo para sa mga powerplant ng SUWECO ngayong Abril 26.
Discussion about this post