Pormal nang inilunsad ng MIMAROPA Transport Cooperative nitong Biyernes, Abril 24, ang kauna-unahang modernized jeepney units sa lalawigan ng Romblon, bilang bahagi ng patuloy na programa ng pamahalaan para sa modernisasyon ng pampublikong transportasyon.
Ang launching ay kasunod ng turnover ng tatlong Class III modernized public utility jeepney (PUJ) units mula sa Isuzu Philippines patungo sa kooperatiba.
Inaasahang magsisilbi ang mga bagong sasakyan sa mga commuter sa Tablas Island, partikular sa rutang Odiongan hanggang San Agustin.
Bahagi ang inisyatibo ng Public Utility Vehicle Modernization Program (PUVMP) ng pambansang pamahalaan na naglalayong mapabuti ang kaligtasan, kaginhawaan, at kahusayan ng transportasyon. Paulit-ulit ding binigyang-diin ni Pangulong Ferdinand R. Marcos Jr. ang pangangailangang isulong ang modernisasyon ng transport sector habang sinisigurong may suporta ang mga driver at operator sa panahon ng transisyon.
Ayon kay Albert Cayetano, chairman ng MIMAROPA Transport Cooperative, ang tatlong unit ay bahagi pa lamang ng kabuuang fleet ng kooperatiba. Aniya, may kabuuang 15 modernized jeepney units na naaprubahan at nabigyan ng prangkisa ng Land Transportation Franchising and Regulatory Board (LTFRB) para sa rutang Odiongan–San Agustin–Odiongan.
Dagdag pa ni Cayetano, inaasahang aabot sa ₱250 hanggang ₱300 ang pamasahe sa one-way trip, habang makatatanggap naman ng itinakdang diskwento ang mga estudyante, senior citizens, at persons with disability (PWDs).
Dumalo rin sa launching ang ilang opisyal ng Romblon na nagpahayag ng suporta sa proyekto, kabilang sina Congressman Eleandro Jesus “Budoy” Madrona at Governor Trina Firmalo-Fabic.
Ayon kay Cayetano, inaasahang magbibigay ang modernized PUJs ng mas ligtas at mas maaasahang biyahe para sa mga pasahero sa Tablas Island.
