Ibinahagi ng Office of Congressman Eleandro Madrona ang impormasyon hinggil sa inaasahang suporta ng Department of Budget and Management (DBM) para sa paglalagay ng electric vehicle (EV) charging stations sa mga lokal na pamahalaan.
Sa ginanap na 40th Annual General Membership Assembly ng Tablas Island Electric Cooperative, inihayag ni Engr. Denon Madrona, Chief of Staff ni Congressman Eleandro Madrona, na may abiso ang DBM na maglalaan ng pondo para sa mga LGU na magpapatupad ng naturang proyekto bilang bahagi ng pagpapalawak ng EV infrastructure sa bansa.
Giit ng opisina ng kongresista, hindi ito maaaring ipatupad ng iisang bayan lamang gaya ng San Agustin o Looc, kundi kailangang saklawin ng mas malawak na koordinasyon ng mga LGU.
Layunin ng panukala na masiguro ang kahandaan ng mga bayan sa pagdating ng mas maraming electric vehicles mula Maynila at iba pang lugar, upang magamit ang mga pasilidad sa lalawigan.
Dagdag pa ng opisina, inaasahan ding makatutulong ang proyekto hindi lamang sa pagbawas ng carbon emissions kundi pati sa mas maayos na paggamit ng kuryente ng TIELCO.
