Isinusulong ngayon ng Provincial Tourism Office ang konsepto ng “slow food tourism” bilang panibagong karanasan na maaaring ialok sa mga bumibisitang turista sa lalawigan.
Sa panayam kay Provincial Tourism Officer Kim Faderon sa ginanap na Kapihan sa PIA Romblon, ipinaliwanag nito na ang slow food technique ay isang immersive na karanasan kung saan mula sa pag-aani o pagbili ng sangkap hanggang sa mismong pagluluto ay kasama at aktibong nakikibahagi ang turista.
Ayon kay Faderon, layunin ng tanggapan na makahikayat ng mga restaurant owners, asosasyon, at mga kooperatiba na handang mag-alok ng ganitong uri ng aktibidad.
“’Yan ang hinahanap namin ngayon sa Romblon—kung sino ang gustong mag-offer ng slow food experience,” aniya.
Sa ilalim ng konseptong ito, kinakailangang may lugar o tahanan na maaaring puntahan ang mga bisita upang doon isagawa ang buong proseso. Halimbawa, maaaring samahan ang turista sa palengke upang pumili ng mga sariwang sangkap para sa isang lokal na putahe gaya ng inaslum. Mula roon ay tutulungan silang maunawaan ang paghahanda, pagluluto, at hanggang sa aktuwal na pagtikim ng kanilang niluto.
“Kasama mo ang turista mula sa umpisa hanggang sa makakain siya. Doon nagkakaroon ng mas malalim na engagement,” paliwanag ni Faderon.
Dagdag pa ng opisyal, hindi nangangailangan ng malaking puhunan ang ganitong programa. Sa halip, mas nakatuon ito sa karanasan at kuwento sa likod ng pagkain.
Inihayag din ng opisyal na nakikipag-ugnayan na rin ang kanilang tanggapan sa Negros, na kilala sa pagpapatupad ng kahalintulad na inisyatiba, upang humingi ng tulong at gabay sa pagbuo ng naturang programa.
Ayon kay Faderon, mahalaga ang teknikal na suporta at pagbabahagi ng karanasan mula sa mga lugar na may umiiral nang slow food model upang matiyak ang matagumpay na implementasyon nito sa Romblon.
Target sana ng Provincial Tourism Office na ilunsad ang slow food tourism sa bayan ng Odiongan bilang pilot area, ngunit hindi ito maipatutupad ngayong summer season dahil kapos na sa oras para sa paghahanda.
“Sa Odiongan gusto naming i-launch ‘yan pero hindi ngayong summer kasi medyo late na. After siguro ng peak season, magpa-planning na kami para dito at i-launch sa buong Romblon,” dagdag ni Faderon.
