Hinihikayat ng pamahalaang panlalawigan ng Romblon ang lahat ng tourism establishments sa probinsya na magpa-accredit sa Department of Tourism (DOT) bilang bahagi ng target nitong pataasin ng 70 porsyento ang bilang ng mga lehitimong akreditadong establisimyento ngayong 2026.
Sa panayam kay Provincial Tourism Officer Kim Faderon sa ginanap na Kapihan sa PIA Romblon, sinabi nito na kabilang sa mga inaasahang magpa-accredit ang mga kainan, hotel, resort, travel agencies, tour operators, at tour guides sa buong lalawigan.
Ayon kay Faderon, aminado ang pamahalaang panlalawigan na may ilang kategorya tulad ng mga hotel ang nahihirapang makumpleto ang mga requirements para sa akreditasyon. Gayunman, hinikayat pa rin niya ang mga ito na subukan at makipag-ugnayan sa kanilang tanggapan upang magabayan sa proseso.
“May mga requirements talaga na kailangang sundin lalo na pagdating sa pasilidad at serbisyo, pero nandito kami para tumulong at magbigay ng technical assistance,” pahayag ni Faderon.
Ipinaliwanag ng opisyal na mahalaga ang DOT accreditation dahil nagsisilbi itong patunay na sumusunod ang isang establisimyento sa itinakdang pamantayan ng kalidad, kaligtasan, at serbisyong angkop para sa mga turista. Nagbibigay rin ito ng dagdag kredibilidad at tiwala mula sa mga lokal at dayuhang bisita.
Bukod dito, ang mga DOT-accredited establishments ay maaaring maisama sa opisyal na promotional campaigns ng ahensya, makatanggap ng imbitasyon sa mga tourism fairs at trainings, at magkaroon ng mas malawak na exposure sa mga digital at marketing platforms ng pamahalaan.
Nagiging prayoridad din ang mga ito sa mga capacity-building programs at iba pang suporta mula sa gobyerno.
Binigyang-diin ng pamahalaang panlalawigan na ang pagdami ng akreditadong tourism establishments ay makatutulong hindi lamang sa pagpapataas ng kalidad ng serbisyo sa Romblon kundi maging sa pagpapalakas ng kumpiyansa ng mga turista, na inaasahang magdudulot ng mas malaking kita at oportunidad sa lokal na ekonomiya.
Discussion about this post