Muling nanawagan ang Barikada ng Mamamayan ng Sibuyan sa pamahalaan na kanselahin ang Mineral Production Sharing Agreement o MPSA ng Altai Philippines Mining Corp. kasunod ng pagbasura ng Supreme Court of the Philippines sa petisyon para sa Writ of Kalikasan laban sa pagmimina sa Sibuyan Island.
Sa inilabas na pahayag ng grupo, sinabi nitong hindi dapat ipakahulugan ang naging desisyon ng Korte Suprema bilang pahintulot sa pagpapatuloy ng pagmimina sa isla.
“Ito ay laban para sa kinabukasan ng isang isla na kinikilala bilang biodiversity hotspot at tahanan ng mga endemic species na hindi matatagpuan saanman sa mundo,” ayon sa statement ng grupo.
Ayon kay Rodne R. Galicha, spokesperson ng BMS, procedural ang naging desisyon ng Korte Suprema at hindi ito maituturing na panalo ng mining company. Gayunman, sinabi niya na hindi pa rin nareresolba ang petisyon para sa kanselasyon ng MPSA ng APMC kahit mahigit isang taon na ang nakalilipas.
Anya, ang pagkaantala sa pagresolba ng usapin ay may epekto sa seguridad ng Sibuyan Island at hindi dapat isakripisyo ang lugar para sa “short-term extraction.”
Samantala, sa panayam ng RNN, sinabi ni Elizabeth Ibañez ng Bayay Sibuyanon na hindi umano tugma ang pagpapatuloy ng pagmimina sa mga hakbang ng pamahalaan para sa pangangalaga ng kalikasan at pagbawas ng panganib ng kalamidad.
Binanggit niya ang mga inisyatibo ng Office of Civil Defense, Climate Change Commission, at Department of Environment and Natural Resources na nakatuon sa disaster risk reduction at proteksiyon sa kabuhayan ng mamamayan.
Dagdag pa ni Ibañez, mahalagang manaig ang pangangalaga sa kalikasan lalo na sa gitna ng tumitinding epekto ng mga sakuna.
“Inaasahan namin na papabor ang gobyerno dun sa pagpreserba sa kalikasan dahil sa mga issues na kinakaharap natin ngayon na malinaw na malinaw na napakarami na ng kalamidad,” ani Ibañez.
Sa ngayon, wala pang opisyal na pahayag ang mga kinauukulang ahensya hinggil sa panawagan ng BMS na kanselahin ang MPSA ng APMC.
