Nagtala ng makasaysayang yugto ang Pilipinas matapos maging matagumpay ang pagho-host ng unang FIFA Futsal Women’s World Cup 2025 na ginanap sa Philippine Sports Arena sa Pasig City mula November 21 hanggang December 7, 2025.
Nilahukan ang torneo ng 16 bansa mula sa anim na confederations: Pilipinas bilang host, Japan, Thailand at Iran mula sa Asia; Morocco at Tanzania mula Africa; Canada at Panama mula CONCACAF; Argentina, Brazil at Colombia mula South America; New Zealand mula Oceania; at Italy, Portugal, Spain at Poland mula UEFA.
Pinatunayan ng Brazil ang kanilang paghahari sa women’s futsal matapos dominahin ang buong torneo at masungkit ang unang kampeonato ng FIFA Futsal Women’s World Cup. Tinapos ng Brazil ang kompetisyon na walang talo mula Group Stage hanggang Finals. Sa Group D, tinalo nila ang Iran 4–1, Italy 6–1 at Panama 9–0. Sinundan ito ng 6–1 na panalo kontra Japan sa Quarterfinals, 4–1 laban sa Spain sa Semifinals, at 3–0 na pagdomina sa Portugal sa Finals.
Bago nakaharap ng Portugal ang Brazil, winalis muna nila ang Group C matapos talunin ang Tanzania 10–0, Japan 3–1 at New Zealand 10–0. Nagpatuloy ang kanilang pag-angat sa 7–2 na panalo kontra Italy sa Quarterfinals at 7–1 laban sa Argentina sa Semifinals bago tuluyang mapigilan ng Brazil sa championship match.
Punô ang Philippine Sports Arena sa huling araw ng torneo habang nagbigay ng mataas na intensity ang Brazil at Portugal sa finals. Nagsimula ang scoring sa ika-10 minuto sa goal ni Emilly ng Brazil, sinundan ng 23rd-minute goal ni Amandinha, at tuluyang sinelyuhan ni Debora Vanin ang panalo sa kanyang 38th-minute strike.
Sa individual awards, pinangunahan ni Emilly ng Brazil ang parangal matapos masungkit ang MVP of the Tournament, Golden Ball, Golden Boot, at maging top scorer na may 7 goals. Nakuha ni Debora Vanin ang Silver Ball, habang si Lidia Moreira ng Portugal ang nag-uwi ng Bronze Ball at Bronze Boot. Si Irene Cordoba ng Spain ang nakakuha ng Silver Boot, at si Ana Catarina Pereira ng Portugal ang itinanghal na Golden Glove.
Nasungkit ng Spain ang 3rd place matapos talunin ang Argentina 5–1 sa battle for third.
Samantala, nagtapos ang host nation na Pilipinas na may 0–3 record sa Group A. Natalo ang national squad kontra Poland 0–6 sa opening match, sinundan ng 2–3 loss laban sa Morocco, at 1–5 laban sa Argentina. Ang tatlong goals ng Pilipinas ay nagmula kina Deonesia Tolentin, Catherin Graversen, at Isabella Marie Bandoja.
