Kumikilos na ang Department of Education (DepEd) Romblon kaugnay sa umano’y reklamong sexual grooming na kinasasangkutan ng tatlong guro sa bayan ng Romblon.
Kinumpirma ni Schools Division Superintendent Roger Capa na nakipag-ugnayan na sila sa mga punong-guro ng mga high school sa bayan ng Romblon upang isumite sa Division ang anumang incident report na may kinalaman sa nasabing isyu.
Tiniyak ni Capa na kung makarating sa kanilang opisina ang opisyal na reklamo ay aaksyunan nila ito batay sa umiiral na Child Protection Policy.
“Rest assured that if this complaint has reached our office, we will act on it accordingly, in compliance with DepEd Order No. 40, s. 2012 or the ‘Child Protection Policy.' We are also conducting our own initial gathering of facts to ensure due process is observed,” pahayag niya.
Hinimok din ni Capa ang publiko na huwag idaan sa social media ang mga reklamo laban sa mga guro, bagkus ay dumaan sa tamang proseso sa pamamagitan ng paglapit sa mga school principal o sa opisina ng DepEd Romblon.
Ito aniya ay upang maprotektahan ang pagkatao ng lahat ng sangkot sa anumang reklamo, lalo na kung sensitibo ang isyu.
Paliwanag ni Capa, tanging administrative cases lamang ang maaaring isampa sa loob ng kagawaran alinsunod sa panuntunan ng civil service at ng DepEd. Kung may krimeng sangkot, nararapat itong isampa sa korte.
Una nang inilantad ni SB Member Miguel Gabriel Montojo, Chairperson ng Committee on Government Affairs, Ethics, and Accountability; Human Rights and Justice, na nakatanggap siya ng ulat na may tatlong guro na sangkot sa umano’y grooming ng mga estudyante, at isa umano rito ay nakipagtalik pa sa menor de edad.
Aniya, hindi kailanman katanggap-tanggap na ang mga guro na inaasahang tagapagtanggol ng kabataan ay siyang gagamit ng kanilang kapangyarihan upang abusuhin ang mga ito.
Nakatakda namang magsagawa ng joint hearing ang Committee on Government Affairs, Ethics, and Accountability at Committee on Women, Family Affairs and Gender Equality ng Sangguniang Bayan para imbestigahan ang usapin.
