Buong pusong nagpasalamat si Trina Firmalo-Fabic sa mga Romblomanon matapos ang kanyang pagkapanalo bilang bagong gobernador ng lalawigan ng Romblon.
Sa kanyang opisyal na pahayag, ipinahayag ni Firmalo-Fabic ang kanyang pasasalamat sa tiwala at suporta ng mga botante na tumangkilik sa kanyang plataporma at adhikain para sa lalawigan.
“Maraming, maraming salamat po sa tiwala, suporta, at pagmamahal ninyo… Hindi ko po ito tagumpay lang, tagumpay po nating lahat ito,” aniya.
Aminado si Firmalo-Fabic na hindi naging madali ang kanilang pinagdaanan sa kampanya, ngunit sa kabila nito ay nanaig umano ang tiwala ng taumbayan.
“Bitbit ko ang pangarap natin para sa isang mas maunlad, mas maayos, at mas makataong Romblon,” dagdag pa niya.
Ipinangako rin ng bagong halal na gobernador na magiging bukas siya sa pakikinig, patuloy na matututo, at magsisikap upang maisakatuparan ang mga inaasam na pagbabago para sa buong lalawigan.
“Simula pa lang ito ng mas malawak na paglilingkod… Handa na po akong iparamdam ang Serbisyong May Puso sa buong lalawigan ng Romblon,” pagtatapos niya.
Si Firmalo-Fabic ay kasalukuyang alkalde ng Odiongan at ang kauna-unahang babaeng magiging gobernador ng lalawigan ng Romblon.
