Bilang tugon sa pangangailangan ng mabilis at maaasahang transportasyon sa mga malalayong isla ng lalawigan, namahagi ang pamahalaang panlalawigan sa pangunguna ni Governor Jose “Otik” Riano ang mga rescue boats sa iba’t ibang munisipyo at barangay sa Romblon.
Ang lalawigan ng Romblon, na binubuo ng mga isla at kabilang sa mga Geographically Isolated and Disadvantaged Areas (GIDA), ay humaharap sa mga hamon sa accessibility ng mga serbisyong medikal at pampubliko, lalo na sa mga lugar na malayo sa mga pangunahing isla ng Tablas at Romblon kung saan matatagpuan ang mga ospital, ahensya ng gobyerno, at kapitolyo.
Ayon sa tanggapan ng gobernador, pangunahing layunin ng rescue boats ang paghatid at pagsundo ng mga pasyente na kailangang dalhin sa mga ospital sa mas malalaking isla. Bukod dito, ginagamit din ang mga bangka sa paghahatid ng ayuda mula sa provincial, regional, at national government.
Nagagamit din ito sa distribusyon ng suplay ng bigas, binhi, at abono mula sa Department of Agriculture; kagamitang pangkabuhayan mula sa BFAR at DSWD; bakuna, gamot, at medical supplies mula sa DOH, PHO, at Office of the Governor.
Magsisilbi rin itong transportasyon para sa mga kawani ng pamahalaan patungo sa mga liblib na isla upang mas mapalapit ang serbisyo sa mga mamamayan.
Ayon kay Riano, matagal na niyang nakita ang pangangailangang ito simula pa noong siya ay nanungkulan bilang Bise Gobernador. Dahil dito, isa ang proyektong rescue boat sa mga naunang naisakatuparan nang siya ay mahalal bilang gobernador. (PR)
