Dalawang inisyatiba ang isinagawa kamakailan upang suportahan ang mga magsasaka ng Romblon sa pagpapabuti ng kanilang agrikultural na produksyon at kabuhayan.
Noong Enero 10, tumanggap ng makinaryang pangbukid ang Mapula Farmers Association at MTILCA Association sa turnover ceremony sa Fishport. Ang mga makinaryang ito ay mula sa Department of Labor and Employment (DOLE), sa pakikipagtulungan ng Municipal Agriculturist Office (MAO) at si Mayor Gerard Montojo.
Layunin ng makinaryang ito na mapadali ang mga gawain sa sakahan at mapataas ang ani ng mga magsasaka.
Samantala, noong Enero 13, 169 na magsasaka ng palay mula sa mga barangay ng Lonos, Agnay, Mapula, Ginablan, Agnipa, Ilauran, Tambac, Macalas, Lamao, Calabogo, at Lio ang nakatanggap ng mga biofertilizer.
Ang pamamahagi ng biofertilizer ay isinagawa sa Barangay Bagacay, sa ilalim ng programa ng Department of Agriculture MIMAROPA. Ang inisyatiba ay naglalayong itaguyod ang sustainable at makakalikasan na pagsasaka.
Ayon sa MAo, ang mga hakbang na ito ay bahagi ng patuloy na pagsusumikap ng lokal na pamahalaan ng Romblon na palakasin ang sektor ng agrikultura, na mahalaga sa kabuhayan ng mga residente.
