Kinilala ang nasawi na si Ben Siñel Cahilig, 53 anyos, residente ng Sitio Bulagsong.
Ayon sa police report mula sa Santa Fe Municipal Police Station na ipinasa sa Romblon Police Provincial Office, nakipagkita umano ang 42 anyos na ginang kay Cahilig sa gitna ng daan sa Sitio Canduyong at nang magkita ay hinila umano siya ni Cahilig patungo sa bundok at hinubaran.
Kwento ng babae sa pulisya, sinubukan niya umanong kumawala ngunit nagawa parin ni Cahilig na makapatong sa babae.
Ilang minuto ang nakalipas ay bigla umanong dumating ang asawa ng babae na may dalang baril at dito niya na pinaputukan si Cahilig sa ulo at sa tiyan dahilan upang ito ay agad na masawi.
Umalis naman agad sa crime scene ang mag-asawa at dumiretso sa Santa Fe Municipal Police Station para magsumbong at sumuko. Hindi narekober ang ginamit sa pamamaril, ayon sa kapulisan.
Samantala, hindi pa malinaw kung bakit nakipagkita ang babae kay Cahilig at kung paano nakasunod sa bundok ang asawa nito dala-dala ang isang baril. Itinaggi ng babae sa kapulisan na may relasyon sila ng nasawing si Cahilig.
Nakakulong na ngayon ang asawa ng ginang at sinampahan na ng kaukulang kaso.
