Ilang pamilya na ang inilikas sa dalawang barangay sa bayan ng Magdiwang sa Sibuyan Island dahil sa banta ng storm surge na posibleng epekto ng bagyong Rolly na patuloy na lumalapit sa kalupaan ng bansa.
Ayon sa Magdiwang Municipal Disaster Risk Reduction and Management Office (MDRRMO), aabot sa 37 na pamilya sa barangay Poblacion at Tampayan ang inilikas sa mga evacuation centers katulad ng covered court at mga paaralan.
Ang mga binanggit na mga evacuees ay mga pamilyang nakatira sa mga baybayin ng Poblacion at Tampayan.
Sa ulat ng Philippine Atmospheric, Geophysical and Astronomical Services Administration (Pagasa), ang lalawigan ng Romblon ay kasalukuyang nasa tropical cyclone wind signal #2.
Ang bagyong Rolly ay huling namataan sa layong 280 km East Northeast ng Virac, Catanduanes at gumagalaw patungong West Southwestward sa bilis na 20 kp/h taglay ang lakas na 215 km/h malapit sa gitna at bugsong aabot sa 265 km/h.
Posibleng mamayang madaling araw ay mag landfall ang mata ng bagyo sa Catanduanes bago tatahakin ang Camarines Provinces at mainland Quezon.
Bukas, posibleng magpaulan na sa Romblon, Metro Manila, Bicol Region, CALABARZON, Aurora, Bulacan, Zambales, Bataan, Marinduque, Occidental Mindoro, at Oriental Mindoro ang bagyong Rolly habang tinatawid ang mga kalupaan ng bansa.
