Pauwi na sana ang isang 34 anyos na residente ng Barangay Hinugusan, San Agustin, Romblon ngunit hindi ito umabot sa kanyang bahay matapos masalpok ng motorsiklo na minamaneho ng isang menor de edad na di umano ay nakainum bandang alas-10:20 kagabi, October 11.
Kinilala ang nasawing rider na si Ben Austin Manguerra Maquinto.
Ayon sa San Agustin Municipal Police Station, ang menor de edad na may tatlong angkas na mga edad 19, 15, at 18, ay nawalan umano ng kontrol sa kanyang motorsiklo dahilan upang masalpok ang kasalubong niyang motor.
Agad silang tinulungan ng mga tauhan ng Bureau of Fire Protection San Agustin ngunit hindi na umabot ng buhay sa ospital si Maquinto.
Dinala ang apat na sakay ng nakaaksidenteng motorsiklo sa Tablas Island District Hospital kung saan sila ginamot.
Sa ulat ng pulisya, nakainum umano ang menor de edad na rider at mga kasama nito. Bagama't hindi nasabi ng pulisya na lasing rin ang nasawing si Maquinto, ayon sa ilang facebook post na nakalap ng Romblon News Network, lumalabas na nakainum rin ang biktima noong araw nang siya ay maaksidente.
