Naaresto ng mga operatiba ng gobyerno nitong Biyernes, October 9, ang isang lalaki sa bayan ng Santa Fe na di umanoy ay nagbebenta ng iligal na droga sa lugar.
Kinialala ang suspek na si Joel Pili Loyola, 33 anyos, residente ng Barangay Poblacion.
Ayon sa spot report mula sa Santa Fe Municipal Police Station, nagkasa ng operasyon laban sa suspek ang mga tauhan ng Provincial Drug Enforcement Unit ng Romblon Police Provincial Office, Philippine Drug Enforcement Agency – Romblon, at Municipal Drug Enforcement Unit ng Santa Fe Municipal Police Station.
Nabilhan umano si Loyola ng isang nagpanggap na buyer ng isang plastic sachet na may lamang pinaghihinalaang shabu sa halagang limang daang piso (P500).
Agad itong inaresto matapos di umanong magkaabutan ng item ang suspek at ang nagpanggap na buyer ng shabu.
Sinasabi rin sa spot report ng Santa Fe Municipal Police Station na may tinatayang 0.1 gramo ang bigat ng nakuha di umanong droga sa suspek.
Nakakulong na ngayon ang suspek sa Santa Fe Municipal Police Station at inaasahang sasampahan ng kasong paglabag sa Section 5 ng Republic Act 9165 o mas kilala bilang Comprehensive Dangerous Drugs Act of 2002.
Wala pang pahayag ang suspek.
