Nagpaalala ang Bureau of Fisheries and Aquatic Resources (BFAR) – Romblon sa publiko na ingatan ang mga endangered species katulad ng mga dolphins, kasunod ito nang pagkalat online ng video kung saan makikita ang mga dolphins na tila hinahabol ng isang bangka.
Ayon kay OIC-Provincial Fishery Officer Luisito Manes, hindi naman umano pinagbabawal ang paglapit sa mga dolphins ngunit dapat umano ay siguraduhin na hindi sila masasaktan o di kaya ay masugatan ng bangka.
“Pwede naman pong lumapit, pero dapat hindi umaandar ang makina para sigurado na hindi sila matatamaan ng propeler ng bangka. Endangered na ang mga dolphins, at sadyang madalas yan dito sa Romblon kasi maganda ang ating mga karagatan, sagana sa isda,” pahayag ni Manes sa Romblon News Network nitong Miyerkules.
Maalalang ang nasabing video ay binatikos ng ilang environmentalist dahil sa tila hinahabol umano ng bangka ang mga dolphins.
“Be that as it may, we all have a duty to let them swim in the wild. It is very clear in the video that the pod was chased which is very detrimental to the sensitive behaviour and well-being of the dolphins,” ayon kay Rodne Galicha, isang environmentalist.
“We hope that environment and toursim agencies will be able to roll-out and enforce policies regarding this kind of case and sustainable eco-tourism in general,” panawagan rin ni Galicha sa BFAR at sa Department of Environment and Natural Resources.
