Inihayag ng lokal na pamahalaan ng Cajidiocan na nag realign sila ng pondo bilang isa sa mga paghahanda sa mga pauwing mga Overseas Filipinos (Returning OFs) at mga Locally Stranded Individuals (LSIs) na naapektuhan ng lockdown dahil parin sa coronavirus disease 2019 o Covid-19.
Sa programang Humbak ng Pag-uswag ng Romblon News Network, sinabi ng tagapagsalita ng Cajidiocan Task Force COVID na si SB Greggy Ramos na aabot sa P10-million ang ni-realign na pundo ni Mayor Nicasio Ramos upang magamit sa pagpapagawa ng isolation center sa kanilang lugar na pwedeng tuluyan ng mga uuwing Overseas Filipinos at LSIs.
“Masaya ko pong binabalita sa inyo na ang munisipyo ng Cajidiocan ay nag-realign ng aabot sa P10m na pundo upang maipagawa ng kongkreto at kompleto na isolation are,” pahayag ni SB Ramos.
Dagdag ito sa kasalukuyang mga isolation facilities sa mga barangay at munisipyo na may aabot sa 104 na bed capacity. Sinabi rin nito na ang nasabing isolation center ay maaring gamitin na evacuation center pagkatapos ng pandemya.
Bagamat wala pang kongkretong proseso na inilalabas ang provincial government ng Romblon sa pagpapauwi ng mga LSIs, sinabi ni SB Ramos na gumagawa na sila ng timeline ng pagpapauwi ng mga gustong umuwi sa kanilang lugar.
Nanawagan naman si SB Ramos sa mga pauwi na maging mahinahon muna habang nag-aantay ng kongretong guidelines.
Aniya, ginagawa na ito ng provincial government at sinisiguro umano nila na hindi pinapabayaan ng gobyerno ang mga taga-Romblon na nasa ibang lugar.
