Inilunsad kamakailan ng San Fernando Municipal Police Station ang kanilang priority desk para sa mga katutubong ‘Mangyan taga-Bukid’ upang mabilis na matugunan ang mga kaso o mga insedenteng idinudulog sa pulisya ng mga ito.
Ang Mangyan taga-Bukid ay mga katutubong naninirahan sa kabundukan ng isla ng Sibuyan kung saan nangangailangan din ang mga ito ng tulong, seguridad at pagtugon mula sa hanay ng pulisya para mapanatiling tahimik ang kanilang komunidad na ginagalawan.
Ayon kay PSInsp. Elmer M. Fajel, OIC ng San Fernando MPS, ang paglalagay nila ng “Mangyan Taga-Bukid Priority Desk” sa kanilang istasyon ay makatutulong din sa mga katutubo upang malaman o maunawaan ang mga batas na ipinaiiral ng pamahalaan at pamamagitan rin umano nito ay maiiwasan ang pagdami ng krimen sa komunidad ng mga ito lalo na sa hanay ng mga bata at kababaihan.
Ang “Mangyan Taga-Bukid Priority Desk” ay makikita sa harap mismo ng San Fernando MPS upang mabilis itong makita ng mga katutubong may ilalapit na reklamo lalo na sa usapin ng pang-aabuso sa abang kalagayan ng kanilang sektor.
Balak ding palawakin ng pamunuan ng San Fernando MPS ang paglalagay ng “Mangyan taga-Bukid Priority Desk” sa mga barangay na kanilang nasasakupan upang mas maraming katutubo pa ang matulungan. (DM/PIA-MIMAROPA/Romblon)
