Ikinatuwa ng kasalukuyang chairman ng Committee on Transportation ng Sangguniang Panlalawigan ng Romblon na si Hon. Felix Ylagan ang balitang magkakaroon na ng biyahe ang Cebgo sa lalawigan ng Romblon sa susunod na taon.
Ayon sa ekslusibong pahayag ni SP Ylagan sa Romblon News Network, isa umano itong welcome development para sa turismo at negosyo dahil sa mababang presyo ng pamasahe nito.
“Welcome development ito para sa turismo at pag nenegosyo sa Romblon, at kung totoong kalahati ang mura sa kasalukuyang presyo ay malaking bagay ito lalong lalo na sa ating mga kababayan na kailangan ng alternatibong pagbyahe lalo na kung nagmamadali,” bahagi ng pahayag ni SP Ylagan.
Ayon sa Cebu Pacific na nagmamay-ari sa Cebgo, February 15, 2017 ang una nilang biyaheng Manila – Tablas – Manila.
Hiling rin ni SP Ylagan na sana rin ay masiguro rin ng pamunuan ng Cebu Pacific ang mga diskwento sa mga senior citizens at persons with disability.
“Sana rin ay masiguro ang mga diskwento para sa mga senior citizens at pwed at makapagbigay sila ng maayos na serbisyo na naayon sa passenger bill of rights,” bahagi ng pahayag ni SP Ylagan.
