Patay ang isang babaeng estudyante matapos itong mahulog mula sa bubong ng isang jeep kaninang umaga sa Sitio Aliwanyag, Brgy. Guinhaya-an, Looc, Romblon.
Kinilala ang biktima na si Carolina Corfel Ignacio, 15-anyos, at residente ng Barangay Guinbirayan, Sta. Fe.
Ayon sa imbestigasyon ng Looc Municipal Police Station, binabaybay ng jeep na may pangalang Fuji Angel na may plate number na DWX 613 na minamaneho ni Gregorio Gaco, 33-years old, ang provincial road sa Guinhayaan ng mangyari ang aksidente. Bigla umanong nahulog ang babaeng estudyante mula sa bubongan ng jeep at nagtamo ng malubhang sugat sa iba’t ibang bahagi ng katawan.
Ayon sa ilang mga nakasaksi sa pangyayari, hindi nila tukoy kung paano nahulog ang babaeng estudyante mula sa bubongan ng jeep.
Nadala pa sa Don Modesto Formilleza Sr. Memorial Hospital at nailipat sa Romblon Provincial Hospital ang biktima ngunit binawian rin ito ng buhay makalipas ang ilang oras.
Dinakip naman ng Looc MPS ang driver ng jeep at nakatakdang kasuhan ng Reckless Imprudence Resulting to Homicide.
