Hinikayat ng Philippine Health Insurance Corporation (PhilHealth) ang publiko na magparehistro upang magkaroon ng access sa mga serbisyong pangkalusugan tulad ng konsultasyon, laboratory examinations at mga gamot na saklaw ng kanilang health insurance benefits.
Ayon kay Atty. Jerry F. Ibay, PhilHealth Vice President for Region IV-B, maaaring magparehistro ang mga mamamayan sa mga Rural Health Unit (RHU) at iba pang accredited health facilities upang mapakinabangan ang mga benepisyo ng programa.
Binigyang-diin ni Ibay na mahalagang samantalahin ng publiko ang mga serbisyong ito dahil ang mga gastusin para sa mga benepisyong saklaw ng PhilHealth ay binabayaran ng ahensiya alinsunod sa mga umiiral na patakaran.
“Pumunta na kayo, mag-enroll kayo sa PhilHealth, magparehistro na kayo kung saan niyo gusto, sa RHU kung saan mang facility, mag-enroll na kayo because meron pong magic word dito, ang magic word po dito ay libre,” pahayag ni Ibay.
Kabilang sa mga serbisyong maaaring mapakinabangan ang konsultasyon sa doktor, laboratory examinations at mga gamot na saklaw ng programa.
“Libre po ang pagpapa-checkup, libre po ang laboratoryo, libre po ang gamot. Actually, nililibre po nila ‘yon pero si PhilHealth na actually ang nagbabayad,” dagdag niya.
Muling hinimok ni Ibay ang mga mamamayan na tiyaking nakarehistro at magtanong sa mga RHU o iba pang accredited health facilities tungkol sa mga serbisyong maaari nilang makuha sa ilalim ng PhilHealth.

























