Hinikayat ng Department of Agriculture (DA) MIMAROPA ang mga magsasaka na magtipid sa tubig at maayos na pamahalaan ang lupa upang mabawasan ang posibleng pagkalugi sa pananim at gastusin dulot ng inaasahang epekto ng Super El Niño.
Ayon kay DA MIMAROPA Development Management Officer V Engr. Maria Teresa B. Carido, partikular na kailangang maging maingat sa paggamit ng tubig ang mga magsasakang umaasa sa rain-fed farms at may limitadong mapagkukunan ng tubig.
Sinabi ni Carido na dapat tiyaking maayos ang irrigation facilities upang magamit nang mahusay ang available na tubig at makarating ito sa mga agricultural area.
“Ang payo po natin mula sa DA para po sa panahon po na ito ay tayo po ay maghanda nang maaga para maiwasan po natin ang pagkalugi sa ani. Mahalaga po na maging mas maingat po tayo at efficient sa paggamit ng tubig, lalong-lalo na sa mga rain-fed o sa may limitadong water source,” ani Carido sa September 30 episode ng Arangkada MIMAROPA, programa ng Philippine Information Agency (PIA) MIMAROPA sa pakikipagtulungan ng Radyo Pilipinas Palawan.
Kabilang sa mga dapat panatilihing maayos ang shallow tube wells upang maiwasan ang mga bara at iba pang problemang maaaring makaapekto sa distribusyon ng tubig.
“Siguraduhin po natin ang maayos na paggamit at maintenance nito. Hindi makakadaloy nang maayos ang tubig kapag may mga bara-bara. Importante na efficient ang paggamit ng tubig at maayos at malinis ang mga irrigation facilities,” dagdag niya.
Pinayuhan din ni Carido ang mga magsasaka na panatilihin ang soil moisture at gumamit ng organic matter, soil conditioners at biofertilizers bilang bahagi ng pamamahala sa lupa sa panahon ng limitadong suplay ng tubig.
Samantala, sinabi ng DA MIMAROPA Disaster Risk Reduction and Management (DRRM) unit na mamamahagi ito ng iba't ibang planting materials, biofertilizers at soil conditioners upang suportahan ang mga magsasaka sa pamamahala ng kanilang agricultural areas sa panahon ng tagtuyot.
Hinimok din ni Carido ang mga magsasaka na pumili ng angkop na pananim at iakma ang kanilang planting schedules upang maiwasan ang mga panahong maaaring mas matindi ang kakulangan sa tubig.
Ayon kay Carido, bahagi ng paghahanda para sa Super El Niño ang wastong pamamahala ng lupa at tubig, soil conservation at paggamit ng angkop na teknolohiya.
“Nais natin paalalahanan na ang tamang pamamahala ng lupa at tubig ay bahagi ng preparedness measures natin sa Super El Niño. Efficient na paggamit, soil conservation at paggamit ng angkop na teknolohiya. Mas mababawasan ang posibilidad na malugi ang ating mga magsasaka,” ani Carido.
