Tumanggap ang Pamahalaang Panlalawigan ng Romblon ng dalawang Patient Transport Vehicles (PTVs) mula sa Philippine Charity Sweepstakes Office (PCSO) noong July 9 sa ilalim ng Medical Transport Vehicle Donation Program (MTVDP).
Personal na tinanggap ni Governor Trina Alejandra Firmalo-Fabic ang mga sasakyan sa turnover ceremony na ginanap sa PCSO Main Office sa Mandaluyong City.
Ayon sa pamahalaang panlalawigan, inaasahang magpapalakas ang dalawang bagong PTV sa kakayahan ng Romblon na makapagbigay ng ligtas at napapanahong medical transport, lalo na para sa mga pasyenteng mula sa mga malalayong isla at geographically isolated and disadvantaged areas (GIDAs) na kailangang ilipat sa mga ospital at mas mataas na antas ng health facilities.
Sinabi ni Governor Firmalo-Fabic na malaking tulong ang mga bagong sasakyan sa pagpapalawak ng access ng mga Romblomanon sa serbisyong pangkalusugan at sa pagpapahusay ng emergency medical response ng lalawigan.
Bahagi ang donasyon ng PCSO sa patuloy na pagsisikap ng pambansang pamahalaan na mapalapit ang mga serbisyong pangkalusugan sa mga komunidad sa pamamagitan ng pagpapalakas ng medical transport at emergency response capabilities ng mga lokal na pamahalaan.
Sa pamamagitan ng Medical Transport Vehicle Donation Program, patuloy na nagkakaloob ang PCSO ng mga patient transport vehicle sa mga lokal na pamahalaan upang matiyak ang mas ligtas, mas mabilis, at mas maaasahang pagdadala ng mga pasyenteng nangangailangan ng agarang serbisyong medikal.
