Kabilang ang Romblon sa mga island provinces na makikinabang sa programa ng pamahalaan na magbebenta ng subsidized diesel para sa mga power provider sa off-grid areas upang matiyak ang tuloy-tuloy na suplay ng kuryente sa gitna ng pagtaas ng presyo ng langis.
Ayon sa Department of Energy (DOE), aabot sa 45 milyong litro ng diesel ang ipagbibili hanggang Agosto sa halagang ₱80 kada litro para sa mga power provider na sakop ng National Power Corporation–Small Power Utilities Group (NPC-SPUG).
Bahagi ito ng mahigit 178 milyong litro ng diesel na binili ng Philippine National Oil Company-Exploration Corporation (PNOC-EC) at naideliver noong Marso at Abril.
Kabilang sa mga target na makinabang sa programa ang mga lalawigang umaasa sa off-grid power generation tulad ng Romblon, Mindoro, Marinduque, Palawan, Catanduanes, Masbate, at Siquijor.
Ayon kay DOE Secretary Sharon Garin, inaprubahan ni Pangulong Ferdinand R. Marcos Jr. ang hakbang bilang bahagi ng Emergency Energy Security Program ng pamahalaan sa ilalim ng Unified Package for Livelihoods, Industry, Food, and Transport o UPLIFT program.
Layunin ng programa na mabawasan ang epekto ng krisis sa Middle East sa suplay at presyo ng produktong petrolyo sa bansa.
“Providing assistance for the diesel requirements of power providers serving missionary areas is a concrete and proactive measure to help protect electricity access and the welfare of thousands of Filipinos living in remote and island communities outside the main grid,” ayon kay Garin.
Ang Romblon ay kabilang sa mga lalawigang umaasa sa diesel-fired power generation.
Discussion about this post