Inanunsyo ni Pangulong Ferdinand R. Marcos Jr. ang pagpapalawak at pagtaas ng maternity benefits ng Philippine Health Insurance Corporation (PhilHealth) na epektibo simula Abril 30, 2026.
Sa isang video message, sinabi ng Pangulo na layunin ng programa na masigurong mas accessible ang prenatal care para sa mga buntis, kabilang ang check-ups, laboratory tests, bayarin sa ospital, at mga kinakailangang gamot.
Sa ilalim ng bagong benepisyo, itataas sa ₱29,000 mula ₱9,750 ang coverage para sa normal delivery. Samantala, para sa cesarean section, aabot na sa ₱58,000 hanggang ₱62,000 ang coverage mula sa dating ₱37,000.
Ayon kay Marcos, sa ilang kaso, posible nang wala nang babayaran ang pasyente lalo na kung manganganak sa ward, kahit sa pribadong ospital.
Pinalawak din ang prenatal care mula apat na check-ups patungong walong konsultasyon, kasama ang bakuna at laboratory tests. Sasagutin na rin ng PhilHealth ang tatlong postnatal follow-up visits.
“Simple lamang ang ating layunin, nais natin na matiyak na ang bawat ina ay makakapagpanganak nang ligtas at hindi nag-aalala kung saan kukuha ng pambayad,” ayon sa Pangulo.
Dagdag pa niya, layunin ng pamahalaan na maiwasan ang mga panganib sa panganganak dulot ng kakulangan sa pinansyal na kakayahan ng mga pamilya.
Discussion about this post