Tumanggap ng livelihood assistance ang 58 magulang ng mga dating child laborer sa bayan ng Romblon sa ilalim ng programang ipinatupad ng Department of Labor and Employment (DOLE) katuwang ang Lokal na Pamahalaan ng Romblon.
Isinagawa ang pamamahagi noong Hunyo 11 sa ilalim ng DOLE Integrated Livelihood Program (DILP), na nagbibigay ng starter kits at iba pang tulong-pangkabuhayan sa mga vulnerable worker, marginalized sector, at pamilyang may mababang kita.
Ayon sa DOLE Romblon, ang mga benepisyaryo ay mga magulang ng mga batang natukoy at na-profile sa ilalim ng Child Labor Prevention and Elimination Program (CLPEP) mula 2022 hanggang 2025.
Kabilang sa mga ipinamahaging livelihood package ang mga refrigerator at kitchen equipment, kagamitan sa marble processing, sewing machine, bangkang pangisda, makina ng bangka, at iba pang kagamitan na nakabatay sa pangangailangan at napiling kabuhayan ng mga benepisyaryo.
Layunin ng programa na matulungan ang mga pamilya na makapagtatag o makapagpalawak ng kanilang pinagkakakitaan upang madagdagan ang kanilang kita.
Ayon sa DOLE, bahagi ng estratehiya ng ahensya ang pagpapalakas ng kakayahang pangkabuhayan ng mga magulang upang mabawasan ang mga salik na nagtutulak sa mga bata na magtrabaho at matiyak na mananatili silang nag-aaral.
Pinangunahan ang pamamahagi ng DOLE Romblon at ng Lokal na Pamahalaan ng Romblon sa pamumuno ni Mayor Gerard Montojo.
Ang programa ay bahagi ng patuloy na pagpapatupad ng Child Labor Prevention and Elimination Program ng pamahalaan na naglalayong protektahan ang mga bata laban sa mapanganib at mapagsamantalang paggawa at suportahan ang kanilang pag-access sa edukasyon at iba pang serbisyong panlipunan.
Inaasahan na makatutulong ang ipinagkaloob na livelihood assistance sa pagpapabuti ng kalagayang pangkabuhayan ng mga benepisyaryong pamilya.
