Isang bahagi ng flood control project sa Barangay Pili, Looc, Romblon ang naabutan ng Romblon News Network na sira matapos bumigay ang harapang bahagi ng embankment.
Ayon sa mga residente, ilang buwan nang sira ang nasabing bahagi ng proyekto. Nang bumigay ito, napansin umano ng mga nakatira roon ang manipis na semento at kakaunting bakal na ginamit sa konstruksyon. Base sa Sumbong ng Pangulo website, dalawang flood control project lamang ang meron sa lugar na parehong natapos itayo noong 2022.
Iniulat din ng mga residente sa Romblon News Network na noong Agosto 19 ay sinimulan nang kumpunihin ng kontraktor ang nasirang bahagi ng proyekto.
Bagamat may bahaging nasira, nagpapasalamat parin ang mga residente ng lugar na nakausap ng RNN dahil nakatulong ang itinayong structure para mawala ang pagbaha sa kanilang lugar.
