Pagkatapos ng makulay at matagumpay na pagdiriwang ng Biniray Festival sa bayan ng Romblon, inilunsad ngayong Linggo ang isang programang naglalayong magbigay ng libreng HIV screening at counseling para sa mga Romblomanon.
Ang libreng serbisyo ay ginaganap sa Romblon Public Plaza mula ala-una ng hapon hanggang alas-singko ng hapon noong Enero 12, at bukas ito sa lahat ng nais magpa-test, nang walang itinakdang target na bilang ng mga participants.
Bukod sa screening at counseling, namahagi rin ang mga organizers ng libreng condoms at Information, Education, and Campaign (IEC) materials upang magbigay-kaalaman tungkol sa HIV prevention at pangangalaga sa kalusugan ng mga residente.
Ayon kay Dr. Gio Ognayon, isang Doctor to the Barrios mula sa Department of Health, mahalagang malaman ng bawat isa ang kanilang sexual health status.
“Sa panahon natin ngayon, dumadami na po ang kaso ng HIV dito sa ating probinsya, especially dito sa municipality ng Romblon,” pahayag ni Ognayon.
Samantala, iniulat ni Rogelio Duco II, ang HIV Coordinator ng DOH, na may naitalang 37 kaso ng HIV sa munisipyo ng Romblon, na siyang pinakamataas na bilang sa buong probinsya.
Ang aktibidad na ito ay bahagi ng patuloy na pagsisikap ng lokal na pamahalaan at mga healthcare partners na mapigilan ang pagkalat ng HIV at mapalakas ang kamalayan ng publiko ukol sa sexual health.
