Ibinida ng mga kandidato sa pagka-Sangguniang Bayan ng Odiongan ang kani-kanilang priority ordinances kung sakaling maupo bilang konsehal ngayong eleksyon 2022.
Ibinahagi nila ito sa naganap na local candidates forum noong Sabado, April 9, na dinaluhan ng 12 sa 20 na kandidato sa pagka-konsehal sa bayan.
Para kay SK Kaila Yap, isusulong nito ang pagkakaroon ng mini libraries at reading centers sa lahat ng barangay sa Odiongan. Gusto rin nitong ideklara ang buwan ng August bilang Youth Month at ang August 11 bilang Youth Day.
Kay dating Municipal Registrar naman na si Rafael Abundio, bibigyan niya ng priyoridad ang mga ordinansang may kinalaman sa kalikasan at kalinisan ng bayan. Kabilang rito ang pagkakaroon ng puno sa bawat bakuran ng isang tahanan.
Sa agrikultura, livelihood promotion, environmental protection, at excelence governance naman nakatutok ang mga priority programs ni Dr. Alexander Formento.
Si Kit Firmalo naman ay sisiguraduhin na magkakaroon ng programang nakatuon sa pagbangon ng ekonomiya ng bayan pagkatapos ng pandemya ng Covid-19. Kung sakaling umanong manalong muli, kanyang bibigyan ng mga pondo ang mga Non-Government Organizations para matulungan ang mga magsasaka at mangingisda na naapektuhan ng pandemya.
Ayon naman kay Agriculturist Jun Fiedacan, magpapasa ito ng ordinansang gagawa ng Municipal Cooperative Development Program incorparated sa Municipal Development Plan ng bayan para sa susunod na taon.
Si Jack Fernandez naman ay tututok sa ordinansa na bubuo ng support group para matulungan ang mga nagkaroon ng mental health issues dahil sa naranasang pandemya ng mundo dala ng Covid-19.
Ang dating Chief of Police naman ng Odiongan na si DonDon Fernandez, susuportahan at magpapasa ng mga resolusyon at ordinansa na masisigurong tahimik at mapayapa ang bayan ng Odiongan. Nais rin nitong magkaroon ang Odiongan ng Emergency Operations Center kung saan dito na ilalagay ang lahat ng CCTV na nakapalibot sa bayan para kung sakaling may aksidente o di kaya ay krimen, mabilis na makakapagresponde ang response team.
Si Deo Fausto naman na isang environmentalist ay nais ang bayan ng Odiongan na may self-sustainability. Paliwanag nito, nais niya na sa darating na panahon kung sakaling magkaroon ng emergency at nawalan ng biyahe ng mga barko galing sa karatig isla at probinsya ay kaya ng bayan na mabuhay.
Si dating Kapitan Jojo Falogme naman ay magpapanukala ng ordinansang makakatulong sa lokal na pamahalaan ng Odiongan na makapagtayo ng bahay kanlungan para sa mga babae at batang biktima ng pang-aabuso.
Ang leader naman ng mga kababaihan na si Gecelle Fainsan ay nangakong ipagpapatuloy ang mga nasimulang proyekto at tulong sa mga iba't ibang grupo ng mga kababaihan.
Nais naman ni ABC President Juvy Faderogaya na magkaroon ng Barangay Development Plan ang 25 barangay sa bayan ng Odiongan. Aniya, kailangan na may plano ang lahat dahil sa pagpaplano nagsisimula ang pag-asenso ng isang bayan.
Ang dating pulis naman na si Rudy Ferrancullo ay tututok sa mga ordinansang may kinalaman sa pagsugpo sa iligal na droga, sa law enforcement, at sa sports.
Samantala, hindi nakapagbigay ng kani-kanilang mga plataporma ang 8 kandidato ng PDP Laban at Nacionalista Party matapos hindi dumalo sa nasabing pagtitipon.
