Isang nag-aamok na lalaki ang nasawi matapos itong mabaril ng tinaga niyang pulis kaninang umaga sa Barangay Taboboan sa bayan ng Odiongan.
Kinilala ang nag-amok na si Erdel Fernando Dalisay, 41 anyos, habang ang pulis namang tinaga nito ay kinilalang si Police Executive Master Sergeant Eugene Cipriano ng Odiongan Municipal Police Station.
Sa ulat ng Odiongan MPS, nakatanggap sila ng tawag mula kay Barangay Kagawad Jovic Fabula bandang 5:30 ng umaga nitong October 25 para mag responde sa pag-aamok nito.
Sinubukang kausapin ng pulis na si Cipriano si Dalisay ngunit bigla umano siyang tinaga sa kamay gamit ang isang sundang.
Dahil sa piligro sa kanyang buhay, binunot nito ang kanyang service firearm at pinaputukan si Dalisay.
Sinubukan pang isugod sa ospital si Dalisay ngunit binawian rin ito ng buhay.
Ayon sa ilang kamag-anak ni Dalisay at sa kapulisan, nakakaranas umano ng depression si Dalisay bago pa man mangyari ang insidente.
