Pormal nang inilunsad noong Oktubre 20 sa probinsya ng Romblon ang kampanyang Duterte Legacy na may temang “Barangayanihan Caravan Towards National Recovery”.
Ang nasabing launching ay ginanap sa Barangay Dapawan sa bayan ng Odiongan, kung saan matatagpuan ang mga opisina ng iba’t ibang national government agency sa lalawigan.
Naging highlight sa maikling programa ang pagbabahagi ng iba’t ibang ahensya ng pamahalaan ng kanilang accomplishments mula nang maupo si Pangulong Rodrigo Duterte noong 2016.
Kabilang sa mga nagbigay ng kanilang updates ang Department of Labor and Employment (DOLE), Technical Education and Skills Development Authority (TESDA), Bureau of Fisheries and Aquatic Resources (BFAR), Department of Public Works and Highways (DPWH), Department of Social Welfare and Development (DSWD), Land Transportation Office (LTO), at Department of Environment and Natural Resources (DENR).
Ang nasabing programa ay inorganisa ng Philippine Information Agency, Department of the Interior and Local Government, at ng Romblon Police Provincial Office.
Maliban dito, naglatag rin ng one-stop shop ang mga nabanggit na ahensya sa venue ng aktibidad para sa 50 kataong dumalo kagaya ng police clearance application, LTMS Public Portal Online Registration ng LTO, Skills Training for Employment Program ng TESDA, Bigay Trabaho Program, at legal advices mula sa PNP.
Binigyan rin ng mga food packs ang 50 kataong dumalo sa launching ng kampanya.
Inaasahang sa susunod na mga araw, ay ilulunsad na rin sa bawa’t munisipyo ang Duterte Legacy:Barangayanihan Caravan Towards National Recovery.
