Arestado sa isang anti-illegal drug buy bust operation ang isang lalaki sa bayan ng Odiongan na di umano ay nagbenta ng ipinagbabawal na iligal na droga nitong Linggo ng tanghali.
Kinilala ang suspek na si Michael Francisco Magbanua, 33 anyos, residente ng Barangay Budiong.
Ang operasyon ay ikinasa ng mga tauhan ng Provincial Drug Enforcement Unit at Provincial Intelligence Branch kasama ang Odiongan Municipal Police Station, RDEU, at PDEA Romblon.
Ayon sa pulisya, matapos magkapalitan ng pera at ng shabu sa suspek ay agad nilang inaresto ang suspek.
Habang kinakausap ng pulisya, itinuro ni Magbanua ang kinukunan niya ng droga na si Donnie John Santos, na agad namang hinanap ng mga pulis.
Nakuha ng mga otoridad kay Magbanua ang 3 piraso ng sachet na pinaghihinalaang may lamang shabu at ang buy-bust money.
Inamin naman ng suspek sa panayam sa kanya ng mga mamahayag na nagbebenta ito ng shabu at kumukuha sa ilang personalidad.
Sinabi rin nito na katatapos lang nito gumamit ng droga bago makipag transaksyon sa mga otoridad.
Nakakulong na ngayon si Magbanua habang inihahanda ang isasampang kaso laban rito.
