Pinaghahanap ngayon ng mga tauhan ng Magdiwang Municipal Police Station ang apat na lalaki sa Magdiwang, Romblon matapos silang makatakas sa raid na isinagawa ng pulisya sa isang iligal na mining site sa Sitio Go-ak, Barangay Ipil nitong April 28.
Kinilala ni Police Captain Edwin Bautista ang mga suspek na sina Augusto Ibabao, Morgan Merano, Jose Ibabao, at Renner Regla, pawang mga residente ng nasabing barangay.
Ayon sa ulat ng Magdiwang Municipal Police Station, nagsagawa sila ng anti-illegal mining operation sa lugar ngunit matapos makatunog ang apat ay agad silang tumakbo para makaiwas sa pagkakaaresto.
Naiwan ng mga suspek ang mga gamit nilang pangmina katulad ng mga makina, bull mill, flashlight, pala, at iba pa.
Nakipagugnayan na ang kapulisan sa barangay officials ng Barangay Ipil para sa ikakahuli ng apat na nakatakas na suspek.
Inihahanda na ang kasong paglabag sa RA 7942 o paglabag sa Philippine Mining Act of 1995 na isasampa laban sa mga nakilalang suspek.
